اوشاقلارین آغزینداکی بویوک شکر کیمی من

سهیلا قمرنیا (تارلا)

شابک : 0-346586-226-879

ناشر : گنج حضور

باجاریقلی اولماق گرکیر آلما درمک اوچون بیر الینی اته ییندن،او بیری الینی آلمادان توتاجاقسان بارماقلارینین اوجونو سیخمایاجاقسان آلمانین جانینا سونرا الینی بورخا_بورخا قوپاراجاقسان اونو، آغاجین آلتیندا اوتوروب گؤزلرینی یوموب دردیکلریندن بیرینی الینه آلیب قوخلایاجاقسان دیشله ییب اوتغوناجاقسان تورشا_ شیرین دادینیگؤزلرینی آچیب گولومسه یه جکسنسونرا اته یینی آچیب آغ_قیرمیزی بویالارینا باخاجاقسان باخارسان … باخارسان…توخونارسان… اللرین آلمایا دؤنوشر، یاناقلارین،دوداقلارین آلما اولار اوره یینده آلما چیرپینار ، بیلیرم آنلایارسان باغچانین دادینی مئیوه لرین یولونو آنلایارسان ،کؤکدن بوداغا گلمه لرینی ، گونشی تامسیندیقلارینی ،یاغیشلا اویناشدیقلارینی ، بیلرسن بیر آلما، آلما اولماق اوچون اوزون بیر یولچولوق سورور ، بونو آنلاسان هر کیمسه نی آنلایاجاقسان یاشاملاری، سانجیلاری ، ورم لری ، آجیلاری ،دالاشما _ووروشمالار، چابالاما ، گولومسه مه لری، باجیم قیزی کیچیک آی سودا کیمی دریندن گولرسن ، بیلینمز یئردن گلر گولوشلرین درینلیکلردن  بارماقلارین اوجوندان یولچولوقلارینی باشلاییب سونوندا دوداقلارینا یئتیشر گولوشلری ده آنلاماق گرکیر و هر شئی بو آنلاماقلا باشلانار بارماقلارینین اوجو توخوندوغون یئرلری آنلاسا،جییه رلرین هاوانی ، گؤزلرین گؤردویونو ، ائشیتدییینی ،دویغولارینی ، بونلاری آنلاسان او آندا یاشایاجاقسان ، او آندا بیر سئودا دوشر جانینا ، ائله آلیشارسان کی بوتون دونیا ایچینده دؤیونر بیلرسن اینسانلارین آجیلارینی ، ازیلمه لرینی ، سئودالارینی ، دونیالارینی ، یولچولوقلارینین بیر آلما کیمی اولدوغونو بیلرسن .و ایندی اته یینده او آلمالار وار یا ، اونلاری چایا بوراخسان یوللاری داهادا گؤزل سورر بؤیوک چایا گئت اته یینی بوشالت ، اوزونو بوشالت ، اللرینی ، یاناقلارینی ، دوداقلارینی ، هامیسینی سویا تؤک و ایزله ، دنیز کیمی بیری توتاجاق اونلاری  بیری توتسا نه اولار توتسون یا …